老辣daddy食住天真林仔
今晚英超話題之戰，當然係睇熱刺主場對車路士嘅兩師徒對決。摩連奴同林柏特情同父子，唔少前車仔球員甚至球迷都稱呼摩佬為「daddy」，不過兩人執教風格迥異，摩連奴係典型功利主義者，為求贏波不擇手段；而林伯則係叫好不叫座，有口碑卻欠成績。正所謂薑愈老愈辣，林伯喺爹哋面前都係變番「林仔」，熱刺讓平半捧上盤。
（Now 621及611周一凌晨零時30分直播）
車路士季初唔畀買人，重用新秀下卻踢出悅目嘅足球，林伯自然被捧到上天，但叻極車仔依家都係排第四，而且近7仗仲輸咗4場之多，坦白講車仔嘅表現其實好唔穩定，只不過球迷對佢哋嘅期望降低咗，先至覺得車仔今季交到貨。
林柏特領軍4戰Big 6輸晒
無可否認車仔今季打起咗好多新星，包括譚美阿巴謙、美臣蒙特及湯姆利等「土炮」，但防線依然可以用恐怖嚟形容，今季只得3場聯賽係保持清白之身，同以往摩佬執教嘅車仔時崇尚防守嘅風格，可謂背道而馳。當摩佬今季仲係做緊講波佬嘅時候，甚至用「天真」嚟形容林伯嘅戰術。事實上，車仔今季4戰Big 6球隊全敗，已充分反映出佢哋嘅弱點，就係防守時壓迫不足，畀對手太多空間，同埋對勝利嘅渴求同執着唔夠，輸波時一句雖敗猶榮就可以安心回家。後生仔始終係後生仔，無論領隊同球員都真係仍幼嫩，對住老謀深算嘅摩連奴等同送羊入虎口。
摩佬充實教練團與時並進
摩連奴接替普捷天奴執教熱刺後，球隊成績有明顯改善，最難得係火力強勁，7場波入咗19球，證明摩佬真係有自我反省，唔再單靠泊大巴贏天下，最大轉變係搵嚟年僅30歲嘅沙卡文度做副手，呢位學院派新星冇做過職業球員，唔係紅褲子出身，但喺戰術分析同情報收集上卻畀到摩連奴好多意見，可見摩佬係有與時並進，唔再眷戀昔日嘅光輝歲月。
最重要係熱刺球員喺摩連奴嚟到後見到希望，隊波唔再係陪跑分子或者永遠二奶命，而係有能力爭標嘅球隊，主將留隊同續約嘅決心大咗，自然解決咗早前嘅信心危機，樂比相信熱刺今場可贏波取代車仔嘅4哥之位。