今晚英超聖誕新年快車壓軸戰，「1哥」利物浦喺主場迎戰錫菲聯。紅軍嘅晏菲路主場威力強勁，今季聯賽主場贏晒，而且經常由頭贏到尾，撞正啱啱被打破客場不敗身嘅錫菲聯，勢必再做急先鋒，1.58倍半場主勝有計。
（Now 621及611周五凌晨4時直播）
紅軍強勢未止，去年尾喺卡塔爾捧走世冠盃後，回國即以4比0作客大炒「2哥」李斯特城，上輪主場再贏狼隊，弗到漏油。除咗前線3叉戟穆罕默德沙拿、沙迪奧文尼及羅拔圖法明奴，奇兵奧歷治亦隨時候命，仲有助攻力極強嘅兩位翼衞阿歷山大阿諾特及安德魯羅拔臣，真係全民皆攻。
錫菲聯兵少快車攰爆
另一邊廂，升班球隊錫菲聯今季表現唔錯，可惜後備力量嚴重不足，嚟到聖誕新年快車嘅頻密賽期即顯疲態，先係僅勝白禮頓、再同屈福特打和1比1，上仗作客全場死守之下，仍淨吞曼城兩蛋，今季聯賽作客不敗身被打破之餘，體力消耗極大未回得切氣，仲要造訪紅軍堅難捱。何況利物浦嘅晏菲路主場威力強勁，今季10場主場聯賽全勝，其中9仗更喺上半場領先，預計佢哋一開波會即刻搶攻，半場主勝值得捧場。