當歐洲各大聯賽都進入歇冬階段時，我哋一班講波佬能有專欄寫、要做球賽評述，真係歸功於英超有聖誕新年快車，賽程超頻密，球迷梗係開心喇，但對球員體能係一大考驗，難怪英超兩大名帥高普同摩連奴，都不約而同話拆禮物日比賽唔係罪，但只得一日休息，跟住即刻再上陣，實在係吃不消。
經過Boxing Day激戰，相信好多英超領隊翌日都唔會叫有份上陣嘅球員狂操，最多讓佢哋輕鬆操練，或做一些有關恢復性嘅物理治療及按摩等，甚至索性放假，迎接三日內第二場硬仗。尤其係對部分限米煮限飯嘅球隊而言，如何喺呢個快車檔期作出適當輪換，非常重要，君不見早前氣勢如虹嘅李斯特城，喺近3仗聯賽未嘗勝果嘛！
利物浦成功在輪換得宜
相反，「1哥」利物浦縱然之前要赴卡塔爾兼顧世冠盃，幸好主帥高普輪換得宜，令上陣球員總係活力十足，呢個亦離唔開佢哋有足夠嘅板櫈深度，而且行運行到落腳趾尾，乘住勁敵李城、曼城接連失分，依家甩開成條街，一般球評家講紅軍奪冠機會高唱入雲，同我一早講定佢哋篤定奪冠相比，已算係明哲保身。講番今晚英超，阿仙奴對車路士、利物浦對狼隊及曼城對錫菲聯，亦頗具睇頭，阿仙奴新帥阿迪達上任冇耐，梗係唔想喺倫敦打吡輸波，而利物浦領先優勢明顯，唔排除迎戰狼隊會派出部分副選應戰，曼城後防不穩，遇上錫菲聯猶如瓷器撞缸瓦，失分唔奇，不妨博大霧小吼和波3串4，攞番個2019年尾彩。