2020年英超第一擊，周三晚上白禮頓主場挑戰車路士。車仔今季客場表現遠勝主場，尤其造訪實力較弱嘅對手絕冇甩拖，況且「海鷗」白禮頓遇強即屈，呢場都唔慌會搶到分，客勝係不二之選。
（Now 621周三晚8時30直播）
車路士繼早前以2比0輕取熱刺之後，上場再以2比1反勝阿仙奴，連續2次喺作客情況下喺「倫敦打吡」贏波，其中前鋒譚美阿巴謙上仗又有士哥，狀態勇銳。事實上，車仔客場成績明顯叻過主場，開咧至今作客已取得21分，遠多過主場嘅14分，對手坐鎮主場同樣主動出擊，明顯益咗一班車仔攻擊好手，畀佢哋有更多空間發揮進攻才能，表現自然較為理想。
白禮頓遇強唔硬撼
白禮頓快車期3戰得1勝2負，無論狀態同戰力均不及車路士，而且白禮頓不嬲有「揀波踢」嘅習慣，尤其面對聖誕新年密集賽程，「海鷗」為保留體力，遇上超班對手都派出副選應戰，留力同實力更接近嘅球隊搏殺，佢哋嚟緊足總盃要對錫周三，大有機會過關，領隊樸達或會再收起部分主力。況且兩軍近5次聯賽碰頭，車仔獲得全勝佳績，白禮頓難有復仇本錢，一於捧車路士客勝。