元旦日英超有好戲碼，阿仙奴主場對曼聯。「兵工廠」自阿迪達接手後仍未開齋，上仗臨尾香被車仔反勝，除再次暴露防線問題外，士氣亦大受打擊，噩運由2019年帶到落2020年，今仗面對「Big 6王」曼聯隨時再出醜，平手盤樂比撐曼聯及2.5/3球大盤。
（Now 621周四凌晨4時直播）
2020年首次同大家見面，樂比喺度講聲新年快樂先，回想起樂比首次喺《東方波經》同各位交流，不經不覺已經係20年前，小弟由樂比仔變成大叔一名，阿仙奴亦由昔日嘅班霸變成中下游球隊。喺足球博彩世界入面，印證咗「變幻才是永恒」呢個道理，即使樂比已寫過數十次阿仙奴對曼聯嘅預告，但每次對賽都係場獨立賽事，每一分鐘都瞬息萬變，一日未收盤，仍然可以下注。
就好似上仗阿仙奴對車路士咁，阿仙奴上半場佔盡優勢，但林柏特兩個果斷嘅調動，令阿仙奴最後10分鐘連失兩球，當然你可以話車仔反勝存在運氣，不過所謂嘅運氣正係由好多細微嘅部分組成，例如阿仙奴門將賓特尼奴送大禮唔係第一次，防線上嘅甩漏係咪冇得救？點解球隊永遠傷兵都多過人？相信好多球迷都同樂比一樣充滿問號。
阿仙奴目前最大問題來自防線，全無執教一隊經驗嘅阿迪達師承哥迪奧拿，進攻上或者有一手，但處理防線問題肯定屬初哥，而且哥帥嗰套必須要由最頂尖嘅球員演繹，睇番阿仙奴依家手牌真係搵着阿迪達嚟搞，何況哥迪奧拿嘅戰術體系係需要長時間浸淫出嚟，阿仙奴董事局同球迷究竟對阿迪達有冇足夠耐性？阿仙奴另一危機係輸到冇晒信心，近15場波只係贏過1場，初哥阿迪達能否壓得住場實在令人懷疑。
紅魔打突擊遇強愈強
曼聯今季Big 6大戰6場未輸過，強如利物浦首循環唯一失分賽事就係同曼聯打和，可見紅魔鬼嘅突擊踢法係幾奏效，前線快攻部隊安東尼馬迪爾、拉舒福特同格連活特雖然看似冇乜章法，但就正正係冇路捉，面對強敵時經常突襲得手。阿仙奴防線四處都係缺口，依家連哥林張伯斯都傷埋，焗住要用梅斯達菲、大衞雷斯，只能夠講一句自求多福。