少帥鬥智以穩為先
今晚英超聖誕新年快車第3站頭場，爆發倫敦打吡，阿仙奴喺主場硬撼死敵車路士，焦點梗係落在兩軍少帥兼名宿阿迪達及林柏特身上。剛接手阿仙奴嘅阿迪達，複製曼城嘅中前場逼搶打法，變相穩住咗防線，車仔主帥林柏特近期改踢3421陣式，3中堅配上雙翼衞協防，明顯以穩行先，加上近年碰頭上半場常未分高下，半場和值得再追。
（Now 621及611周日晚10時直播）
阿迪達幫到兵工廠防線
阿迪達與林柏特球員時代都係打中場，以睇通大局同冷靜見稱。其中啱啱接手阿仙奴嘅新帥阿迪達，近年喺曼城擔任助教跟哥迪奧拿學嘢，令佢堅重視「全民逼搶」，防守唔單止係後衞嘅責任，應該由中前場做起，呢點正係阿仙奴多年來搞唔掂防守不穩嘅主因。達哥上仗首度領軍對般尼茅夫，雖然排出慣常嘅4231陣式，但前線嘅奧巴美揚、拿卡錫迪、雷斯尼爾遜及懶到出汁嘅奧斯爾，每逢失去控球權即湧上前做反搶，有效阻止對手進攻，仲有覆蓋範圍大嘅防中盧卡斯托拉拿殿後，大大減輕防線壓力，就算最終打和1比1，達哥連稱滿意，加上中堅哥林張伯斯停賽期滿復出，進一步鞏固兵工廠防線。
林柏特變陣3中堅收效
另一邊廂，車路士早前5場聯賽4度敗陣，表現反覆，林伯隨即喺快車首站變陣3421主守陣式，用魯迪格、葛特蘇馬及湯姆利出任3中堅，連同兩翼衞瞻前顧後，令防線變得更穩，更以2比0擊敗由恩師摩連奴領軍嘅熱刺，可惜到第2站佢哋踢番主動搶攻，即以0比2輸畀修咸頓，吸取教訓後，今場造訪死敵唔敢輕舉妄動。翻查紀錄，阿仙奴同車路士近9次正面交鋒，各得2勝5和2負，當中有7次開出半場和，其中5次半場波膽為0比0，可見兩軍碰頭初段都穩陣為上，而達哥同林伯都深明倫敦打吡嘅重要性，大家都唔想輸波失威，半場和不妨追多鋪。