今晚英格蘭聯賽盃4強首回合，李斯特城主場迎戰阿士東維拉。維拉上圈能晉級，只因利物浦派青年軍出戰，依家護級大過天，冇力兼顧盃賽，「狐狸」3連勝走出谷底，有望乘勝追擊，讓1/1.5球照捧上盤。（周四凌晨4時開賽）
今季重返英超嘅維拉，在英聯盃順風順水，一來只係撞正克魯、白禮頓等弱旅，二來有運，上圈抽中對英超榜首利物浦，又咁啱嗰個禮拜佢哋要遠赴卡塔爾出戰世冠盃，撞晒期之下，惟有一隊去打世冠盃，留番青年軍踢英聯盃，維拉梗係唔同你客氣喇，最終大勝5比0晉級。不過好運嘅嘢總有盡頭，維拉啱啱先喺英足盃畀英冠仔富咸踢出局，都幾影響士氣，而且喺聯賽仍徘徊下游，仍需為護級搶分，盃賽重要性較低，今仗隨時留力。
近10仗主場獲8勝
另一邊廂，李斯特城雖有射手占美華迪因傷倦勤，但捱過早前4場不勝困局後，狀態復甦，近3仗取得全勝，一眾生牯仔如艾約斯佩雷斯、占士麥迪臣及哈維班尼斯非常搶韁，老實講爭聯賽機會渺茫，反而殺入英聯盃決賽只差一步，今仗仲先有地利，老虎蟹都搏埋佢。加上「狐狸」近10仗主場出擊，豪取8勝1和僅1負，主場威力不容忽視，就算讓1/1.5球都冇有怕，上盤有計。