默郡打吡南野登場
周一凌晨英格蘭足總盃第3圈話題之戰，利物浦主場同愛華頓上演「默西賽德郡打吡」。「紅軍」今季喺晏菲路球場出擊無人可擋，呢場對住由安察洛堤領軍嘅死敵「拖肥」愛華頓，當然要用表現話畀「肥安」知：利物浦先係「默西賽德郡1哥」。近年交手利物浦主場出擊都搶韁，呢場隨時一開波就狂攻，半場主勝值得留意。
（myTV Gold 306周一凌晨零時01分直播）
意大利名帥安察洛堤執教愛華頓，令整個利物浦市足球生態產生變化，「拖肥糖」球迷希望以安察洛堤功力，推翻多年來屈居喺利物浦之下嘅形勢，事實上，安帥上任後喺快車期獲2勝1和，上場亦只係力戰以1比2僅僅輸畀強敵曼城，大有復甦味道。對家表現回勇，「紅軍」上下當然亦有目共睹，不過，利物浦今季持續勇態，聯賽遙遙領先之餘，早前遠征卡塔爾捧走世冠盃，歐聯亦強勢殺入16強，士氣爆燈。
主場對愛華頓慣早領先
利物浦今季之所以成功，除咗穆罕默德沙拿、羅拔圖法明奴同沙迪奧文尼繼續有高水準發揮之外，連奧歷治等後備兵都有貨交，加上1月高調引入嘅日本中場南野拓實，呢場有望首次為「紅軍」披甲，絕對有足夠兵源爭奪本土盃賽，較早前英聯盃因要參加世冠盃被迫起用年輕球員而出局，呢次英足盃肯定倍加努力。以往利物浦喺主場面對宿敵愛華頓甚少甩拖，近6次喺晏菲路踢打吡戰，5次半場已取得領先優勢，相信呢場會繼續先下手為強，主動圍攻愛華頓，推介半場主勝。