夏薩特巴利唔出得
西超盃周四凌晨喺沙特阿拉伯揭開序幕，4強華倫西亞率先鬥皇家馬德里。皇馬王牌夏薩特因傷冇份踢，令箭頭賓施馬孤掌難鳴，呢場對住連續7場不敗嘅華倫，難有本錢讓波，一於捧讓球主勝。（周四凌晨3時開賽）
今屆西超盃賽制大改動，過往由西班牙盃同西甲冠軍對壘，踢兩回合定勝負，如今就改由西盃冠軍，加上西甲前三名共4隊以淘汰賽形式競逐，比賽地點亦移師至沙特阿拉伯舉行，希望因此增加西班牙足球嘅曝光率。
作為上季聯賽「2哥」，皇馬今季雖然咬緊「1哥」巴塞隆拿，但攻力不濟問題一直為人詬病，單計啱啱過去嘅2019年，「銀河艦隊」喺54場正式比賽合共只入100球，每場平均攻入不足2球，係球隊近10年來入球最少嘅1年。尤其是今季加盟皇馬嘅王牌球星夏薩特被寄予厚望，可惜自去年11月底重創長抖後，球隊明顯失去進攻重心，令本來腳風奇順嘅箭頭賓施馬於前線孤掌難鳴，難怪「銀河艦隊」聯賽連盃賽近4場僅1勝3和，合共入得4球。更慘情嘅係，另一主力加里夫巴利因病缺操，今仗肯定唔踢得，令「艦隊」火力進一步削弱。
華倫近7戰不敗
以西班牙盃冠軍身份參戰嘅華倫西亞季初風雨飄搖，好彩喺施拿迪斯中途接手後成績穩步上揚，聯賽連盃賽近7戰取得4勝3和，除歐聯順利進身16強外，上月中聯賽更曾以1比1打和今場對手皇馬，表現極具說服力。況且，華倫中場干卡路古亞迪斯同李康仁已告傷愈隨隊出征沙特，西超盃有機會披甲，陣容復整，呢場有望於法定時間抵禦皇馬，讓球主勝值博。