今午澳職有場獨腳戲，兩支下游球隊墨爾本勝利同紐卡素噴射機為搶分而戰。勝利雖然上仗打吡戰贏波，但佢哋主場成績仲衰過作客；噴射機剛終止連敗，今仗有力全身而退，讓球客勝捧得過。（myTV Gold 302、Now 639、有線655及615台周日下午3時30分直播）
墨爾本勝利上場「墨市打吡」踢出爭氣波，作客2比1砌低死敵墨爾本城，不過踢打吡戰鬥志勝於一切，贏波唔代表真係回勇，而且佢哋今季主場戰績反而仲衰過作客，開咧6場主場只係贏過珀斯光輝，季初澳足盃主場踢至加時，以2比3反輸畀今場對手噴射機，可見毫無主場威力，今日想上演復仇騷並唔容易。
近兩次交鋒噴射機1勝1和
噴射機今季令人失望，暫時敬陪末席，佢哋上場大部分時間領先下，臨尾先畀布里斯班獅吼逼和1比1，但總算終止3連敗頹勢，何況近兩次對墨爾本勝利，噴射機喺法定時間1勝1和，作客有權搶分而回，讓球客勝值捧。