第3圈開波！英超兵加入戰團
英格蘭足總盃第3圈開打，英超列強出場，周六晚就有英超對撼戲碼，狼隊主場迎戰曼聯。狼隊喺領隊紐奴悉心調教下，已經進身成英超前列分子，今屆歐霸盃更殺入32強，整體實力及發揮皆有水準，況且狼隊一向敢於強攻曼聯，近3次交手獲2勝1和，今場狼隊讓平半，上盤值捧。
（myTV Gold306周日凌晨1時31分直播）
經過英超聖誕新年快車後，列強重整旗鼓，於英足盃第3圈出發，狼隊同曼聯今季都係聯賽及歐霸盃雙線發展，兩軍皆能殺入歐霸32強，聯賽亦只相差1分齊齊排喺前列，單論實力，雙方不相伯仲。狼隊元旦日作客屈福特輸1比2，累積快車獲2勝2負，代表作是以3比2力挫曼城，表現不俗。至於曼聯於快車尾站同樣衰收尾，以0比2不敵阿仙奴，快車成績都係2勝2負。
狼隊今季要踢歐霸盃外圍賽，雖然較早開咧，但狼隊主場盃賽成績醒神，今季7戰獲5勝1和1負，合共射入14球只失3球，可見狼隊出戰盃賽特別集中，唔會大意失波。
近3次對曼聯2勝1和
全賴主帥紐奴個人感染力強，尤其喺盃賽鼓動球員情緒有一手，狼隊上季曾經喺英足盃8強以2比1擊敗由蘇斯克查帶領嘅曼聯，心理上佔優，累積近3次對紅魔鬼獲2勝1和，相信今場可憑主場之利力壓曼聯，上盤可取。