上季英足盃盟主曼城，則於主場迎戰英乙代表維爾港，展開衞冕第一擊。曼城上季榮膺本土三冠王，今季英超衞冕機會已相當渺茫，盃賽遂成主帥哥迪奧拿續命草，佢一向重視足總盃，派大量主力上陣，所以好多時都會大炒低組別對手，今場出擊對乙組仔，肯定唔會手軟，即使中位數調高至5.5球，照捧入球大。
（myTV Gold 308周日凌晨1時31分直播）
曼城將會於5日內接連喺本土2項盃賽進行衞冕戰，今晚足總盃第3圈出擊，以及下周三深夜作客曼聯，進行聯賽盃4強首回合賽事。由於聯賽畀利物浦拋離太遠，只能盡力而為，今季曼城可能轉為向盃賽3冠王進發，稱霸本土2盃及歐聯。
踢足總盃例多波入
哥帥對英足盃頗為重視，根據去年經驗，雖然都會讓部分副選上陣，但仍然保持有半隊以上正選球員，如史達寧、阿古路及馬列斯等都會輪流上陣搏殺。翻查曼城於英足盃表現，即使面對弱旅亦絕不留手，近6次出戰英足盃賽事，5次總入球達5球或以上，尤其曼城喺快車戰績一般，更需一場大勝振奮士氣。
維爾港現時排英乙第10，抽到曼城只有嘆句唔好彩，不過佢哋快車賽程成績唔差，錄得1勝3和，最叻仔係場場有波入，曼城後防唔穩陣，今日維爾港如果肯放開心情鬥攻，隨時同曼城上演精彩入球騷，入球大要捧場。