紅魔殘陣攻守都差
周三凌晨英格蘭聯賽盃4強首回合焦點戰，曼聯主場同曼城合演曼市打吡。曼市雙雄今季遭受各自問題困擾，不過無論係表現穩定性或近況，「藍月亮」始終更勝一籌，「紅魔」呢場缺少防線主將哈利馬古尼，更加難同死敵周旋，捧番客勝好過。（周三凌晨4時開賽，馬會網上文字直播）
曼聯踏入2020年依然一勝難求，繼新年首戰喺聯賽以0比2不敵阿仙奴之後，上仗再喺英足盃以0比0賽和狼隊，一班前鋒連續兩場啞火，魔迷睇波睇到無癮，就連曼聯名宿尹佩斯都睇唔過眼，早前開腔批評球隊未能為前線提供足夠彈藥，影響進攻效率。「紅魔」傷兵名單除咗有麥湯米尼之外，早前一度傷愈復出嘅保羅普巴又再整親，呢位法國中場2018年捧起世盃之後，本應進一步鞏固自己世界一流中場嘅身份，可惜一直受傷病纏身長期缺陣，個人發展響起警號之餘，亦令魔迷一再失望。呢場就連哈利馬古尼呢位防線核心都因傷倦勤，曼聯隨時攻守兩端都失序，戰力唔值得高估。
相反衞冕英聯盃嘅曼城，繼英超2比1擊敗愛華頓之後，上仗英足盃再以4比1輕取維爾港，其中傷愈復出嘅阿根廷射手阿古路踢足全場之餘，個人仲有波入，狀態已經返晒嚟，計埋2020年頭兩場勝仗，「藍月亮」近8仗7勝1負，走勢回勇。既然聯賽被利物浦遠遠拋離衞冕機會渺茫，英聯盃更加唔可以輕易放棄，相信領隊哥迪奧拿呢場會派出强陣應戰，有本錢反客為主，撐客勝。