西甲雙雄分途踢打吡！今晚先有皇家馬德里作客進襲同市勁敵基達菲，去到周日凌晨就有愛斯賓奴迎戰巴塞隆拿合演「加泰羅尼亞打吡」。其中「銀河艦隊」今季患上賓施馬依賴症，進攻過於單調，對住踢法保守嘅基達菲，呢位法國前鋒隨時被嘜實，一於吼實半場和。
（ViuTV99、Now 632周六晚上11時直播）
皇馬喺歇冬前錯過登上西甲榜首嘅良機，2020年首戰當然不容有失。可惜「銀河艦隊」進攻手段單一問題嚴重，頭號前鋒賓施馬聯賽至今轟入12球，但緊隨其後竟然係斬獲3球嘅沙治奧拉莫斯，呢位皇馬隊長今仗停賽，夏薩特又有因傷倦勤，勢令進攻重擔落返喺賓施馬一人肩上。況且，基達菲目前進佔第6位，靠嘅就係穩健防守，至今只失17球仲少過巴塞，尤其喺開波初段好氣好力，近10戰5個失波中，上半場只失3球，當中有8次同對手半場打成平手，呢場半場和值得再追。
愛斯賓奴細頂巴塞
至於喺周日凌晨，「1哥」巴塞隆拿就作客愛斯賓奴，上演「加泰羅尼亞打吡」。今季巴塞作客成績平平，先後輸過畀利雲特同ＣＦ格蘭納達等弱旅，為免再次大意失分，肯定唔會好似踢主場咁全民開「攻」。另邊廂，愛斯賓奴至今已3度換帥，比聯賽贏波次數仲要多，不過艾比拿度匆匆上任，一時三刻未必做到嘢。翻查紀錄，兩軍近5次對壘，愛斯賓奴獲1勝1和3負，4次開3球或以下，相信今場都會擺好鐵桶陣死守，捧番中位數3.5球入球細好過。
（Now 611及632周日凌晨4時直播）