自今季開咧以來，利物浦所展現出前所未有嘅強勢，頭20場豪取19勝1和，包括聖誕新年快車3連捷，令曼城、李斯特城等勁敵感到絕望，再次印證我早前一番說話，紅軍今季篤定奪得英超錦標，而非好大機會、高唱入雲等模稜兩可嘅說法，只需等到時間一到便會封王。
當然，成功並非一朝一夕，尤其係踏入英超時代，先係被死敵曼聯長期壟斷，並有大水喉射住嘅車路士、曼城輪流坐莊，利物浦經歷7任主帥後，喺2015年先迎嚟真命天子高普掌舵，再逐步組織雄厚班底，更飽歷過歐聯決賽飲恨、上季聯賽功虧一簣等教訓，先至成就今日嘅贏波機器。
曼聯現疲態不宜高估
因此，其他球隊惟有向另一些目標埋手，包括歷史悠久嘅英足盃。今晚英足盃有狼隊對曼聯，曼聯啱啱輸畀阿仙奴明顯有疲態，而且中場保羅普巴不斷製造問題，不宜高估。至於熱刺改由摩連奴接手後，表現唔見得比前任普捷天奴更好，就算明晚主場對住英冠仔米杜士堡都唔易打，同樣中途易帥嘅另一支北倫敦球隊阿仙奴，喺新帥阿迪達帶領下，球員嘅鬥心明顯有所提升，周一對列斯聯值得繼續留意。