西甲歇冬期過後戰火重燃，周六凌晨先後上演兩場大戰，其中西維爾主場硬撼畢爾包，阿King度咗條過關心水畀大家。畢爾包進入冬休前發揮夠硬淨，呢場阿度里斯等主力亦有望復出，大大增加同西維爾搶分嘅本錢，畢爾包下盤好路。
（Now 632周六凌晨4時直播）
今季聯賽首戰就擊殺衞冕之師巴塞隆拿嘅畢爾包，整體發揮硬淨，近9仗只係喺聯賽輸過畀貝迪斯，剩番嘅8場取得5勝3和佳績，加上阿度里斯同蒙尼恩兩大中前場主力已經傷愈復操，呢場有機會回歸戰陣，勢令呢隻「巴斯克雄獅」搶分能力激增。況且西維爾進歇冬前3場聯賽僅取1勝1和1負，走勢波動，呢場正選左閘利古朗累積黃牌夠數要停賽，實力打折扣，捧番畢爾包下盤好過。
華拉度列讓唔起雷加利斯
至於較早時間開波，仲有華拉度列主場鬥雷加利斯。2019年年尾由墨西哥名帥艾古爾接手嘅雷加利斯，表現漸入佳境，計埋盃賽至今4戰不敗，相反華拉度列聯賽已經6輪未贏過，呢場無乜本錢讓波，首選雷加利斯下盤。（Now 632周六凌晨２時直播）
最後整多場西乙激鬥，薩拉戈薩主場迎戰希杭，薩拉戈薩兩大後防主力艾拔圖古坦同戴爾馬斯齊齊坐波監，為防線留下隱患，呢場希杭有機會偷雞，一於吼實讓球客勝。