意甲歇冬期後重開，又等阿King度條過關好路。其中周一凌晨羅馬將會主場鬥拖連奴，羅馬冬休前乘勇態佔據前4有利位置，聯賽重開後當然唔可以放開手腳，對住後防時有甩漏嘅拖連奴，羅馬有望大勝輕取對手，吼實讓球主勝。
（myTV Gold 301、Now 638、有線614及654台周一凌晨3時45分直播）
羅馬於歇冬前狀態回勇，7戰豪取5勝2和，單計聯賽嘅話亦有4勝1和，除了老牌射手迪斯高今季已轟入7個聯賽入球外，祖斯甸古華特、柏洛迪同尼高路辛尼奧路等攻擊手亦輪流發威，連帶左閘老將高拉洛夫今季都已斬獲5球，可見羅馬入球點甚多，令對手防不勝防，歇冬前12場聯賽贏得3場嘅拖連奴，更加唔會係羅馬嘅對手。何況兩軍近5次聯賽碰頭羅馬全勝，其中近3次坐鎮主場，有2次都贏拖連奴3粒，呢場有本錢再大炒對手，讓球主勝好路。
另外仲有布雷西亞主場挑戰拉素，拉素先後喺聯賽同意超盃雙殺班霸祖雲達斯，氣勢如虹，對住護級分子布雷西亞更加唔會留手，睇好拉素反客為主取得大勝，讓球客勝值博。
（myTV Gold 301、Now 638、有線614及654台周日晚7時30分直播）最後再串多場熱拿亞對薩斯索羅，熱拿亞今季第2度換帥，由前烏甸尼斯主帥尼高拉接替被炒嘅莫達，不過佢哋嘅性感足球踢法，應該一時半刻都改唔到，相反薩斯索羅近5場作客未輸過，包括曾經賽和祖雲達斯，呢場受讓好路，一於再捧讓球客勝。
（myTV Gold 301、Now 638、有線614及654台周一凌晨1時直播）