熱刺踏入新一年堅係當黑，唔單止喺元旦日聯賽輸畀修咸頓，射手哈利卡尼亦喺嗰場傷出，初時估計需要抖4至6周，但根據熱刺官方最新透露，證實「哈神」左腳大腿腿筋撕裂，傷勢比預期嚴重，暫時未知幾時可以復出，令人擔心佢可能會缺席今季餘下賽事，提早收咧。熱刺未來1個月將有唔少大戰，包括英超對利物浦及曼城，下個月歐聯16強亦會開打，如果哈利卡尼長抖，肯定打亂領隊摩連奴嘅部署。
基斯甸艾歷臣勢投國米
禍不單行嘅係，熱刺中場基斯甸艾歷臣離隊心意已決，呢位丹麥國腳將於今夏約滿，但佢一直拒絕續約，若果熱刺唔想人財兩空，今個月就要放人，據丹麥媒體《Ekstra Bladet》聲稱國米比較有誠意，已經開出2,000萬鎊轉會費，加上熱刺唔想放畀曼聯等競爭對手，於是更傾向接受國米報價。
至於今晚英格蘭足總盃第3圈，熱刺作客由舊將活基治執教嘅英冠球隊米杜士堡。熱刺除咗哈利卡尼之外，門將洛里斯、左閘丹尼路斯亦因傷倦勤，米堡近4仗贏晒之餘，單計主場亦豪取4連勝，唔怕天殘地缺嘅熱刺，主場出擊仲受讓半一，下盤有買趁早。
（myTV Gold 307周日晚10時01分直播）