想晉級焗攻冇得守
歐聯16強次回合爆騷！首回合落後0比1嘅熱刺，今晚作客「德國狂牛」RB萊比錫，想晉級冇得諗，一定要喪攻，可惜佢哋後防不穩，近7場全部有失波，隨時畀更多空位RB萊比錫打反擊，加上熱刺近5場歐聯作客全開4球或以上，2.5球嘅大盤抵玩！（myTV Gold303、Now 643、有線656及616台周三凌晨4時直播）
熱刺季中請嚟「寸王」摩連奴上任，諗住大展拳腳，點知上季取得好成績嘅兩位關鍵功臣哈利卡尼同孫興民齊齊重創，如意算盤打唔響，仲搞到兩頭唔到岸，現時仲要為聯賽前4苦苦掙扎，歐聯只掹水入到淘汰賽，首回合落後只有作出取捨，因此日前聯賽對般尼畀部分主力休息，不過最終又因防線甩漏，只能以1比1逼和般尼，今晚16強次回合對RB萊比錫，勢必以攻代守力求翻盤。
迪姆華拿恨入波證明自己
比較好彩嘅係，熱刺陣中球員好多都經歷過上季歐聯4強，當時熱刺首回客亦曾於主場不敵阿積士0比1，不過次回作客反勝對手3比2晉級，預計熱刺今仗即使欠缺「哈神」同孫興民，摩連奴亦會以盧卡斯莫拉、迪利阿里同貝雲積等強攻對手，鋒力仲有一定信心。
「德甲狂牛」RB萊比錫今季歐聯同聯賽均表現出色，預期前場壓逼嘅踢法，會畀到熱刺中後場甚大壓力，如果今仗熱刺採取主動，後防將會出現更多空位，尤其前鋒迪姆華拿受到各大歐洲球會包括利物浦嘅青睞，如果可以繼首回合後再攻入熱刺大門，證明佢去到英超都啱使啱用。
摩連奴雖然以防守戰術見稱，但熱刺今季防守力唔算強，尤其近仗更出現嚴重漏洞，近7場全部有失波，相信今場只要出現首個入球，雙方都會瘋狂進攻，既然熱刺近5場歐聯作客全開4球或以上，今場中位數2.5球大盤變得好抵買。