贏打吡戰走出低潮
澳職周六重頭戲，榜首FC悉尼主場布陣迎戰「5哥」珀斯光輝。悉尼上場「國家打吡」以4比1反勝墨爾本勝利，擺脫早前小低潮，相反光輝聯賽則2連敗，狀態此消彼長；FC悉尼近11次常規賽鬥光輝贏10次，主隊讓平半捧上盤。
（myTV Gold 302、Now 639、有線615及655台周六下午2時直播）
悉尼早前因要兼顧亞冠盃，連帶國內表現亦略受影響，唔單止喺亞冠盃頭2輪分組賽只得1分，兩周前對住同市宿敵西悉尼流浪者更以0比1落敗，今季聯賽第2次輸波，不過陣中球員經驗豐富，經調整後火速重上正軌，上場國家打吡作客墨爾本勝利雖然先失1球，但憑將士用命成功連追4球反勝4比1，近8場聯賽保持7勝佳績，爭勝信心未有動搖。
近11次交手悉尼贏10場
光輝上季雖然力壓FC悉尼勇奪常規賽冠軍，不過今季成績大倒退，踢完19輪比賽僅排第5位，落後悉尼16分兼多踢1場，唔好講話想衞冕常規賽冠軍，甚至要保持前6出戰季後賽都唔太穩陣。光輝近6場聯賽只得1勝3和2負，作客面對尾2嘅紐卡素噴射機亦輸1比2，作客擺明腳仔軟，而且光輝近11次喺常規賽鬥FC悉尼輸10次，當中5次作客有4次輸2球或以上，可以講係FC悉尼「私房菜」，再訪凶地注定冇運行，FC悉尼讓平半一於捧上盤。