周五德甲獨腳戲上演護級戰，尾3杜塞爾多夫主場迎戰包尾嘅柏達邦，雙方實力唔強但鬥志好到加零一，相比之下杜塞爾多夫自由前曼聯名宿羅斯拿執教後，球隊精神面貌大有進步，但若要成功護級，主場對榜尾呢啲波就必須取勝，球隊整體實力同狀態確勝一籌，黑柴撐主勝。（Now 670、FOX+、有線651及611台周六凌晨3時30分直播）
杜塞爾多夫歇冬後頭兩場聯賽輸晒，排名一度跌到包尾，高層立即炒咗功勳老帥芬基，搵嚟羅斯拿接手，球隊表現同積極性都大有進步，上任至今8戰2勝5和僅輸1仗，不過因為勝率唔高，雖然由包尾升番上尾3，仍落後尾4緬恩斯4分，今晚主場呢3分志在必得，佢哋上輪作客緬恩斯搶攻形勢甚至喺主隊之上，今仗主場遇弱係贏波黃金機會。
柏達邦少大敗博埋讓球和
柏達邦實力擺明係德甲最弱，雖然乜波都肯搏，但有時又搏得太過無謂，好似上月底作客安聯球場對班霸拜仁，全場搶逼搶攻付出120分，可惜對手太強最終都僅負2比3，最慘係首席射手麥巴該役重創要長抖，令球隊火力大減，近兩輪面對中下游對手緬恩斯同科隆就因為冇入波板斧而全敗。目前佢哋距離尾3嘅杜塞爾多夫有成6分差距，今仗和都幫唔到幾多，焗住繼續攻，更有利杜塞爾多夫踢反擊。不過杜塞本身實力唔強，柏達邦場場落後咗都砌到尾絕少大敗，今場推介1.77倍主勝之餘，求好分頭可以博埋3.7倍嘅讓球和。