另一場歐聯16強次回合生死戰，法甲班霸巴黎聖日耳門（PSG）主場迎戰德甲代表多蒙特；PSG首回合落後1比2，想晉級一定要搶攻，不過佢哋後防向來唔穩陣，對住近期着晒火嘅艾寧夏蘭特及查頓辛祖好難唔失波，相信今場好大機會與首回合一樣，一有入波出現即會變成對攻局面，捧中位數3球、3球半大盤最明智。
（Now 644、有線601及661台周四凌晨4時直播）
由於受新冠肺炎疫情影響，歐洲足協宣布今場將改為閉門作賽，雖然冇主場球迷打氣，但對首回合輸1比2嘅PSG嚟講已經冇得揀，必須主動搶攻爭取贏先有機會晉級；PSG賽前傳出壞消息，前鋒基利安麥巴比生病上陣成疑，連同停賽嘅中場馬高華拉堤及守將梅尼亞，未能夫添之下，戰鬥力或打折扣，不過佢哋上周末聯賽同受肺炎影響須要延期，變相有更多時間休息，相比之下，多蒙特上場聯賽作客擊退前列對手慕遜加柏，體力消耗應較大，陣容不整嘅問題相信可抵銷。
多蒙特近6作客失13球
PSG今季喺各項賽事已經攻入128球，就算缺少麥巴比，鋒線仍有尼馬、卡雲尼、莫路伊卡迪及迪馬利亞等好手，鋒力毋庸置疑，不過佢哋對上8場比賽只有1場冇失波，堤亞高施華夥拍派斯奴甘佩比嘅中路組合唔算穩陣，如果搵馬昆奴斯哥利亞打中堅，中場掃蕩能力又會減弱，面對以速度見稱嘅多蒙特鋒線肯定疲於奔命。同樣地，多蒙特近6場作客加埋失咗13球，只有1場冇失波，今場要抵擋PSG強攻亦唔容易。論人腳及整體實力，兩軍其實半斤八両，上次首回合要踢到下半場中段先由艾寧夏蘭特打破悶局，不過一係唔入，一入兩隊就喺短短8分鐘之內連轟3球，證明兩隊鋒線把握力極強，後防受壓便容易失波，PSG今場許勝不許和，相信入波會比上場嚟到早，捧3/3.5球入球大最好路。