今晚「倫敦打吡」阿仙奴主場鬥韋斯咸，「兵工廠」踏入2020年聯賽未輸過，仲有機會殺上前4，主場出擊當然不容有失，佢哋近4場聯賽主場獲3勝1和；「錘仔幫」作客極曳，近5作客輸晒，一於熱捧主Ｗ。
（Now 621周六晚11時直播）
阿仙奴自阿迪達接手後，球員已逐漸適應佢嘅陣式同戰術，今年7場聯賽獲3勝4和，可惜之前歐霸大意出局，想踢來屆歐聯唯一途徑就係打入聯賽前4（未計曼城被罰事件）。佢哋現時落後第4位車路士8分，但就少踢1場，仍有機會後來趕上。
奧巴美揚主場腳風順
阿仙奴陣中最有把握力自然係奧巴美揚，呢位加蓬射手主場出擊腳風特別順，近兩仗交出3球，現時以17球同李斯特城嘅占美華迪並列射手榜首位，喺其他隊友配合下，要喺後防甩漏多多嘅韋斯咸身上取得入球，並非難事。
韋斯咸向來畀阿仙奴剋住，近4次作客酋長球場全部輸波，「錘仔幫」近況同運氣都差，連同今仗在內，聯賽接連作客前列強隊，包括利物浦、曼城同李斯特城，導致近5場聯賽作客全敗。阿仙奴3分志在必得，強捧主勝。