今晚另一場歐聯16強次回合，華倫西亞主場火併阿特蘭大。華倫喺首回合慘敗1比4，加上兩大中堅非傷即停，撞正擅打反擊嘅阿特蘭大堅牙煙，寧捧客勝。（Now 644、有線661及601台周三凌晨4時直播）
防線主力非傷即停
「蝙蝠兵團」華倫首回合慘敗1比4，表現曳到冇朋友，不過總算取得1個作客入球，若果今場淨勝3比0，就可憑較多作客入球晉級，可惜佢哋防線多災多難，先喺年頭有中堅加雷重傷提早收咧，拍檔基比爾包列斯達於分組賽尾輪對阿積士「直紅」被逐，繼上仗後今場仲要坐波監，連另一守將文加拉都傷埋，焗攻下猶如紙紮嘅防線，勢必暴露更多空位。此外箭頭麥斯高美斯亦受傷，洛迪高摩連奴近8仗有上陣賽事入得1粒，真係攻守都靠唔住。
阿特蘭大喺分組賽奇迹出線，16強首回合更大炒華倫，全靠超強火力。喺「進攻狂人」加斯柏連尼執教下，一眾射手如路爾斯梅利爾、杜雲沙柏達及伊利錫等都可盡情發揮，難怪佢哋近6場豪取5勝1和狂轟24球，全開3球或以上，包括出現2次單場入7粒，火力勁得人驚，造訪防線曳爆嘅華倫，勢必有更多打反擊機會，有力再贏1場，歷史性首度進身8強。