近10主場賽事全勝
英格蘭足總盃16強今晚上演獨腳戲，大勇嘅英甲3哥樸茨茅夫主場挑戰英超阿仙奴。「兵工廠」實力同往績都佔優，但啱啱喺歐霸盃苦戰120分鐘飲恨出局，對陣中年輕球員嘅士氣打擊甚大，加上今仗好大可能會派出大量二線兵應戰，啃唔落主場強勢嘅樸茅，阿仙奴作客讓到1/1.5球太多，寧捧下盤。
（周二凌晨3時45分開賽）
兵工廠二線兵讓唔起
阿仙奴近況本來唔錯，上周中歐霸32強次回合之前，近10場正式賽事錄得6勝4和不敗佳績，歐霸首回合作客領先奧林比亞高斯1比0，形勢大好，可惜上周五凌晨喺主場一鋪輸清，法定時間輸0比1搞到要加時，最終仲要因為作客入球數唔及對手意外出局，力疲心傷之餘仲士氣受挫。激戰過後，今仗相信會沿用之前英足盃倚重嘅二線兵，戰鬥力下滑，再睇番佢近8場作客嘅正式賽事只係贏過2場，贏波把握甚低。
樸茨茅夫以英甲仔身分出師牌面係低兩班，但折合番阿仙奴用弱陣，雙方差距已縮窄，更何況佢哋近10場主場正式賽事全勝，除咗爭緊升英冠之餘，喺盃賽亦冇偷懶，今仗兩大射手箭頭約翰馬基斯同愛爾蘭國腳路蘭居迪斯拍檔攻堅，足以考驗阿仙奴條唔多穩陣嘅防線，主場受讓咁多值得一博。