英格蘭聯賽盃決賽今晚爆發，阿士東維拉喺溫布萊球場挑戰衞冕嘅曼城！曼城今季矢志成為「盃賽三冠王」，今晚當然志在必得，維拉牌面輸蝕兼狀態低落，而且近4次對曼城更全輸3球或以上，曼城讓2/2.5球，上盤仍然值得捧場。
（周一凌晨零時30分開賽，馬會網上文字直播）
曼城衞冕英超機會名存實亡，球會早已轉移目標做「盃賽三冠王」，佢哋於周中歐聯16強首回合作客以2比1先贏皇馬，晉級機會樂觀，今晚係「盃賽三冠王」首部曲，當然不容有失。
「藍月亮」領隊哥迪奧拿其實相當重視今場決賽，始終袋咗一隻盃落袋最穩陣，所以早幾日嘅歐聯大膽收起晒幾位主力，包括射手阿古路、史達寧、費蘭甸奴同大衞施華，相信今晚即使只係面對英超排17嘅維拉，哥帥亦唔會掉以輕心，上述球員都會正選上陣，勢以獅子撲兔姿態衞冕。
藍月亮近4交手全部大勝
維拉晉級過程非常有運，8強抽中要踢世冠盃用青年軍嘅利物浦，結果輕鬆5比0大勝晉級，但維拉今次面對曼城似乎就再冇偷雞機會，尤其維拉近期狀態頗差，近3戰全敗，今場爆冷機會甚微。睇埋往績，曼城以往4次對維拉，全部贏3球或以上，包括1月時大勝6比1，擺明食住對手，今場就算讓2/2.5球都可放心捧場。