法足盃4強大戰，里昂主場硬撼巴黎聖日耳門（PSG）。PSG於國內大超班，無論實力及板櫈深度均遠勝里昂；里昂兼顧4條戰線開始有疲態，加上近4次對PSG輸3次，主場出擊都冇着數，PSG讓一球波童捧上盤。
（myTV Gold 302、Now 639、有線615及655台周四凌晨4時10分直播）
兵源雄厚多條戰線未驚過
PSG、里昂今季同要應付法甲、歐聯、法聯盃及法足盃4條戰線，兩軍早前已經打入法聯盃決賽，估唔到再喺法足盃4強狹路相逢。PSG近年橫掃國內球壇，法足盃更加連續5屆入決賽，除上屆意外射輸12碼畀雷恩，其餘4屆均順利封王，今屆捲土重來決心十足。PSG比起其他球隊優勝地方係兵源夠雄厚，好似季初頻頻有士哥嘅莫路伊卡迪近期竟然淪為後備，可見隊中良性競爭夠晒激烈。王牌尼馬上場聯賽坐波監，變相可養精蓄銳踢今仗，呢名巴西國腳今季19次上陣一共轟入16球兼有9次助攻，配合基利安麥巴比、卡雲尼及迪馬利亞等鋒將，真正打遍國內無敵手。
里昂早前喺歐聯16強首回合主場雖然贏過祖雲達斯1比0，不過同時又會喺聯賽失分畀尼斯、艾米恩斯等弱旅，表現極反覆，全因主帥魯迪加西亞不擅輪換，來來去去都係嗰14、15個球員搏殺，對球員體能消耗極大。今季聯賽首循環碰頭，PSG主場曾以4比2大勝里昂，就算今次主客互調，PSG依然有力喺法定時間之內贏波，連續6屆躋身決賽，PSG讓一球照捧上盤。