「銀河艦隊」歐聯沉船士氣曳
今晚西甲尾場爆發至激國家打吡，「2哥」皇家馬德里主場火併「1哥」巴塞隆拿。皇馬箭頭賓施馬喺聯賽入球率跌Watt，王牌夏薩特一傷再傷，加上近期頻頻失分兼喺歐聯新敗，打擊士氣，相反巴塞球王美斯及時弗番，近年造訪巴拿貝戰績堅sharp醒，仲有得受讓咁筍，讓球客勝咪錯過。（Now 632及611周一凌晨4時直播）
歐洲多國受新冠病毒影響，不少球賽亦受影響，惟西班牙衞生部認為，由於染病個案未有大幅增加，所以當地預警級別維持喺第一級，暫時毋須控制大量人群嘅活動，所以西甲聯賽會覺得呢場國家打吡，唔存在新冠肺炎擴散風險，不必閉門作賽或改期。
夏薩特收咧打亂皇馬陣腳
講番場波，皇馬連續兩輪聯賽失分，畀巴塞搶回榜首位置，睇番佢哋近9場聯賽只入13粒，其中前鋒僅佔3粒，賓施馬更加入得1球咁大把，有負主帥兼「契爺」施丹嘅期望。施丹喺冬季轉會窗冇乜動作，因為養傷多時嘅夏薩特正係最佳「新援」，點知佢復出冇耐即喺對利雲特之役足踝受傷，好大機會提早收咧，打亂晒施丹加強進攻嘅如意算盤。最弊係上周中歐聯16強首回合領先之下，末段忽然走樣反輸畀曼城1比2，臨國家打吡前咁樣輸波，確實影響信心。
巴塞早前經歷易帥起伏後，上周中歐聯雖僅以1比1賽和拿玻里，但總算拎到作客入球，而且近6場聯賽取得5勝1負，明顯重上正軌，一度4場聯賽食白果嘅隊長美斯，上輪大勝伊巴5比0之役食出大四喜，連同球會及國家隊賽事，喺職業生涯共轟696球，兼且交出306次助攻，參與入球突破1000大關。
除此之外，呢位以26球成為國家打吡史上士哥王嘅射手，其中有15球喺皇馬主場巴拿貝球場取得，今仗猶如返「主場」比賽，有指主帥史坦恩打算起用新兵中鋒巴夫韋迪擔正，有佢喺前線掩護，相信美斯同基沙文會有更多數胡機會。翻查紀錄，巴塞近7次對皇馬4勝3和未輸過，單計近4次聯賽造訪皇馬更加贏晒，仲有得受讓筍到爆，讓球客勝有買趁早。