周六晚德甲重頭戲，班霸拜仁慕尼黑作客火併剋星賀芬咸，拜仁王牌射手羅拔利雲度夫斯基缺陣，前線入球能力當然有影響，不過球隊正準備同教練漢斯弗利克續約，眾將勢必拚盡為呢位深受佢哋擁戴嘅主帥造勢，加上要報首循環主場敗辱，今晚作客戰意高昂，黑柴推介讓球客勝。
（Now 670、FOX+、有線651及611台周六晚10時30分直播）
拜仁近期強勢沒法擋，近9輪德甲8勝1和重返榜首之餘，歐聯16強首回合亦作客大炒車路士3蛋，令會方對季尾約滿嘅教練漢斯弗利克非常滿意，較早前喺佢慶祝55歲生辰時，主席路明尼加送上一支名筆，話方便佢喺重要文件上簽名，仲有消息話拜仁會喺下月19日主場對車路士賽後同佢續長約，弗利克深得球員愛戴，眾將當然想喺佢續約前為佢造勢，鬥志加零一。
賀芬咸傷「鋒」嚴重
拜仁賽前傳嚟壞消息，王牌射手羅拔利雲度夫斯基喺作客車路士後驗出左膝脛骨輕微骨折，要養傷4周，若面對頂級勁旅或者有較大影響，但陣中始終仲有基拿比同湯馬士梅拿等質態兼備「士哥拿」， 對住德甲中游球隊絕對游刃有餘。
賀芬咸今季首循環曾作客爆冷贏拜仁2比1，月初德國盃作客亦僅輸3比4，但睇番呢兩仗5個入球，1個係拜仁中堅謝路美保定擺烏龍，另外4球分別由好波之人阿達美恩同新加盟嘅以色列射手摩尼斯達保射入，可惜呢兩位射手，加埋上季主力箭頭貝科迪爾，今晚都因傷缺陣，連首席射手卡拉馬歷都有傷在身，傷「鋒」程度比拜仁更嚴重。賀芬咸近3輪德甲只得1分，上輪鬥慕遜加柏絕對劣勢下補時逼和對手超好運，今晚面對級數更高嘅拜仁，過到初一未必過到十五嘞！