德國盃8強戰今晚開打，焦點係史浩克04主場迎戰班霸拜仁慕尼黑。史浩克近況跌至冰點，仲要傷兵成災，連穩陣教頭大衞華拿都話只能望天打卦，球隊面臨嘅危機隨時畀質態超群嘅拜仁進一步引爆，一場大屠殺恐難避免，黑柴推介拜仁讓球客勝。（香港開電視77台、有線661、601、662及602台周三凌晨3時45分直播）
史浩克自去年底開始一直行衰運，主力球員接連受傷，而且個個傷親都大鑊嘢，防線主力沙利夫辛尼同史譚保利一早已經係十字兵，近期中場最具創造力嘅蘇奧沙達同卡利古尼都接連重創，上輪聯賽對科隆之前，隊長兼最硬淨防中馬斯卡利都證實要長休，另一防線重心奧辛卡巴克，對科隆踢咗唔夠30分鐘亦傷出，仲傷到要送院治療，難怪賽後大衞華拿話：「我睇到陣上球員表現唔好，但已經冇人可換，依家只有盼望班傷兵快啲好番！」
人腳不足應付兩條戰線
史浩克近6場聯賽未贏過之餘，仲只能夠喺榜尾柏達邦身上入過1球，近兩仗面對萊比錫同科隆共吞8蛋，連反擊能力都冇，信心接近崩潰，積分榜除被列強拋離外，下屆歐戰席位都岌岌可危，若然嚟緊周六對第8位嘅賀芬咸輸埋，仲會畀對方爬埋頭，形勢惡劣，現階段難有餘力兼顧盃賽。
相反拜仁愈戰愈勇，即使王牌射手羅拔利雲度夫斯基養傷，上輪聯賽作客都炒賀芬咸6蛋，基於下輪聯賽主場遇弱旅，跟住歐聯對車仔又有明顯領先優勢，可以疊埋心水踢好呢場德國盃，遇上天殘地缺嘅史浩克大勝可期。