盃賽叫緊胡無謂嘥力屈機
利物浦目前喺英超以22分遙遙領先，奪得30年來首個聯賽冠軍只係遲早嘅事，大家嘅關注力早已去咗第二度，由能否以全季不敗或破紀錄得分封王，去到依家希望平平安安，但願球季唔好受到疫災影響。今晚紅軍作客屈福特表面上強弱懸殊，但要輕取對手唔易，樂比揀讓球和。
（Now 621周日凌晨1時30分直播）
利物浦聯賽已18連勝，好多人話球隊歇完冬仲「立咗」，但一支球隊總有高低起伏，尤其係踏入二月歐聯淘汰賽展開，下周中又要喺足總盃作客車路士，領隊高普為兼顧三條戰線，聯賽唔會吓吓同你去盡，睇住嚟食拎3分就得，故近兩仗對諾域治同韋斯咸都係小勝1粒，上場更係驚濤駭浪反勝，今場隨時出現類似場面。
睇番賽程，利物浦最早可以喺下月22日主場對水晶宮鎖定冠軍，不過利物浦依家絕對唔心急，畢竟聯賽早已成囊中物，反而歐聯同足總盃仲叫緊胡，如果贏晒加埋個世冠盃做四冠王，咁就真係名留青史，甚至叻過1999年嘅曼聯「三冠」，人係貪心嘅，利物浦聯賽留有一手係可以理解，最緊要都係3分到手。
「大黃蜂」屈福特自從喺去年12月搵咗兩位前李斯特城領隊皮雅臣同莎士比亞救火後，成績有明顯改善，尤其係主場先後殺退曼聯及狼隊，另外逼和熱刺，呢幾場表現都有目共睹，雖然睇番近績近5場未贏過，但當中有4場作客值得原諒，今仗佔主場之利，應該會頂得吓。
屈福特遇強少大敗
事實上，屈福特對強隊係有一手，喺去年十二月皮雅臣剛接手時，第一場波就係對利物浦，該仗利物浦雖然贏2比0，但過程踢得相當辛苦，第2球都係臨完場先入，經過兩個月嘅準備，加上主客互調，相信屈福特會畀到紅軍更大壓力，今場揀讓球和啱數。