德乙海登咸主場對韋恩，海登咸喺聯賽重開第一擊作客慘吞波琴3蛋，爭直接升班遇阻滯，重回主場必定加多兩錢肉緊，希望全取3分，不過，今場對手韋恩亦有料到，由於需要護級鬥心十足，上仗更爆冷擊敗史特加，士氣正盛亦唔怕同海登咸鬥攻，加上佢哋雙閘齊齊停賽更易失波，今場捧中位數2.5球入球大。（on.cc東網周六凌晨零時30分直播）
海登咸上仗作客不敵波琴唔算太令人意外，但輸0比3就真係估佢唔到，因為佢哋之前12場作客只失15球，但上場已經失3球，似乎球隊後防停擺後未回到神。好彩海登咸嘅升班主要對手，由榜首嘅比勒費爾德到第5位嘅格雷特霍夫全部失分，海登咸先冇被大幅拋離。今仗海登咸返主場作賽，以佢哋近8場聯賽主場5勝3和嘅表現，相信有力同對手一拚。
雙閘停賽易失波
韋恩上輪以2比1絕殺前列分子史特加，可算係海登咸不被前列拋離嘅恩人，韋恩全取3分後，現時以28分排第16位，與12位嘅波琴只有3分距離，為咗盡快脫離降班漩渦，佢哋必定乘勇博喺海登咸身上搶分，因此一定唔會被動死守。
不過，韋恩今場後防都好大鑊，左右兩閘賓尼迪克洛卡同莫肯哈普特上仗齊齊攞黃牌，同樣累積5黃需要停賽，對踢開3個後衞陣式嘅韋恩部署有好大影響，海登咸肯定睇住呢點喪攻。既然海登咸停擺前4場聯賽主場3次開3球或以上，今場2.5球入球大穩開。