阿仙奴利物浦玩大佢

 豪門對撼射手鬥數胡
英超周四凌晨上演重量級大戰，盡最後努力爭奪歐霸盃資格嘅阿仙奴，會喺酋長球場迎戰今季盟主利物浦。「兵工廠」主場出擊不容有失，利物浦喺冇壓力下出賽亦可盡情鬥攻，加上兩大豪門近年對戰經常上演「入球騷」，激戰可期，中位數3.5球嘅入球大值得一試。（Now 621、611周四凌晨3時15分直播）

阿仙奴上場聯賽輸畀熱刺後，距離第7位嘅錫菲聯4分，如果要透過聯賽拎歐霸盃入場券，最後3輪聯賽基本上係不容有失，今仗主場出擊一定要以3分為目標。

拿卡錫迪重拾射門鞋
阿仙奴近期失分，好大程度係因為防守經常出現低級失誤，但進攻表現其實唔差，箭頭拿卡錫迪最近重拾射門鞋，小將布卡約沙卡同尼高拉斯比比亦都上力，阿仙奴進攻更見流暢，加上王牌前鋒奧巴美揚近5場聯賽主場入6球，為爭奪金靴獎肯定會落力數胡。

利物浦已經贏得冠軍，可惜上場畀般尼逼和，今季主場聯賽連勝紀錄斷纜，依家目標係要以超過100分完成球季，球員冇壓力下可以輕鬆作戰，自然可以放膽進攻，穆罕默德沙拿及沙迪奧文尼兩大射手都想提升入球數字，肯定會向阿仙奴瘋狂發炮。

值得一提嘅係，阿仙奴近年同利物浦交鋒不乏戲劇性比數，季初聯賽盃就曾經踢成5比5平手，睇番阿仙奴近9次對住利物浦，有8次總入球開4球或以上，今場必追3.5球嘅入球大。