羅馬尼亞主W愛得過

新星崛起Vs暮氣沉沉
周六凌晨歐國聯B1大戰，羅馬尼亞主場迎戰北愛爾蘭；羅馬尼亞上年於U21歐國盃表現出色，一眾主力亦成功接捧進身大國腳，戰力有保證；相反北愛爾蘭仍未解決青黃不接問題，上屆歐國聯更錄得4戰全敗，暮氣沉沉，主場出擊嘅羅馬尼亞有力響頭炮。

（周六凌晨2時45分開賽）

羅馬尼亞對上一次出戰世盃決賽周已經係1998年，之後雖然入過2008、2016歐國盃決賽周，但全部分組賽出局，屬陪跑分子，直至前國家隊成員拉度爾喺2018年出任羅馬尼亞U21領隊後，情況終於有改善，拉度爾帶領U21打入去年歐國盃決賽周，並喺分組賽力壓傳統勁旅法國及英格蘭進身4強，演出大獲好評，賽後拉度爾獲提升為國家隊主帥，U21主力包括一代名將赫傑囝囝伊亞尼斯赫傑、前鋒佐治普斯卡斯等亦理所當然躋身大國腳，成為歐洲其中一股最有潛實嘅新興勢力。

北愛青黃不接活力欠奉
北愛爾蘭喺2016歐國盃歷史性首次進身決賽周，不過分組賽早早畢業，實力難登大雅之堂。北愛目前三線仍以前鋒拉菲迪、隊長史提芬戴維斯及中堅莊尼伊雲斯做骨幹，3人俱已年過30，活力欠奉，面對年輕力壯嘅羅馬尼亞更加輸蝕。北愛上屆於歐國聯B3分組賽4戰全敗，相信今屆亦難成氣候，羅馬尼亞主勝值捧。