「兄弟國」內訌捷克惡晒

東歐兄弟國斯洛伐克同捷克，今晚喺歐國聯B2組首輪賽事碰頭。捷克近年「大蝦細」，近4次對斯洛伐克3勝1負，包括上屆歐國聯主客2場都贏晒，效力RB萊比錫嘅前鋒柏德列舒希克2仗均有進帳，今場捷克可延續剋星本色。（周六凌晨2時45分開賽）

斯洛伐克冇埋咸錫
喺1993年「天鵝絨分離」分裂出嚟嘅斯洛伐克與捷克，上屆歐國聯成績一般，所以繼續喺B級聯賽角逐。不過，如果計算歐國外成績，捷克則遠超斯洛伐克，捷克於分組賽僅次於英格蘭，以A組次名直接出線決賽周，相反斯洛伐克仍要靠附加賽出線，下年附加賽4強要鬥愛爾蘭。

斯洛伐克近年成績轉差，開始出現青黃不接，主要係靠咸錫撐住，不過呢位沙場老將目前喺中超大連人搵食未有隨隊，球隊實力大打折扣，加上一號門將效力紐卡素嘅杜巴夫卡因傷缺陣，令斯洛伐克焗住用一班超過30歲嘅球員落場，莫講話贏，想有分落袋都幾難。

捷克以布拉格斯拉維亞球員做骨幹，配合兩名德甲兵包括效力哈化柏林嘅隊長達列達，以及RB萊比錫射手柏德列舒希克，活力及經驗皆不俗，其中柏德列舒希克對上2次對斯洛伐克都有斬獲，助球隊分別於主場以1比0及作客2比1贏波，今場佢肯定正選上陣博殺，捷克有力反客為主。