33歲卡佩圖做藍衫軍新丁

文仙尼執教意大利國家隊後，唔只創出佳績，而且不斷提拔新兵，為球隊注入新血，文帥今次出戰歐國聯嘅大軍名單又有新搞作，揀選咗3位「新丁」，包括國米中堅巴斯東尼，2位薩斯索羅球員卡佩圖、文路爾盧卡迪利。

當中最引人注目梗係卡佩圖，事關呢位前鋒自2005年出道至今，絕大部分時間喺低組別聯賽搵食，甚至踢過業餘球隊，直至加盟當時踢緊意乙嘅巴里，事業先至有起色，協助球隊於2008/09年球季獲得意乙冠軍，升上意甲。

技術全面或成秘密武器
上年夏天加盟薩斯索羅，卡佩圖更創出事業高峰，去季意甲上陣36次入21球，排射手榜第4位，其中薩軍兩循環逼和1哥祖雲達斯，佢都有入波，可以話係蔗渣價錢踢出燒鵝味道，令佢以33歲「高齡」首度獲徵召入「藍衫軍」，真係估佢唔到。

卡佩圖技術全面，可以勝任前鋒同翼鋒，甚至可以客串進攻中場，意大利有呢位全能老將，令球隊進攻招數更加多元化，絕對唔好因為年齡，而忽略佢嘅重要性，甚至可以視為意軍嘅秘密武器。