意大利波斯尼亞玩大佢

兩軍射手有料到
歐國聯A1組上演意甲射手大戰，意大利主場對波斯尼亞，意軍擁有上季意甲轟入36球嘅神射手恩莫比尼，波斯尼亞亦有羅馬老牌射手迪斯高助陣，雙方攻力有保證。加上意大利由文仙尼執教之後，崇尚進攻足球，近9場比賽有8場總入球達3球或以上，首選中位數2.5球嘅入球大。

（香港開電視77台、有線661及601台周六凌晨2時45分直播）

意大利傳統注重防守，但自從前鋒出身嘅文仙尼接手領軍後，採取反傳統策略，包括用433進攻陣式，以拉素射手恩莫比尼擔當正前鋒，配合兩翼恩斯治尼、費達歷高基艾沙，令進攻招數更多元化。恩莫比尼上季意甲表現大勇，射入36球，成為意甲神射手及歐洲金靴獎雙料得主，「藍衫軍」有佢在陣，要撕破波斯尼亞防線，並唔困難。

文仙尼掌帥崇尚進攻
仲有一個關鍵因素係以往嘅意大利主帥往往見好就收，導致經常小勝，但文仙尼要求球員盡數對手，好似上年歐國盃外圍賽，先後以5比0及6比0大勝列支敦士登，最後1場肯定出線情況下，仍然大炒阿美尼亞9比1。意大利各項賽事已經11連勝，證明文仙尼主攻戰術奏效，應會繼續沿用。

另一邊廂，波斯尼亞隊長迪斯高上季意甲有16球進帳，加上佢已經效力羅馬5季，應付慣意大利防守球員，以佢過去高企嘅入球數字，證明意式防守攔唔住佢。美中不足係中場大將比真歷因為感染新冠肺炎未能入選。就算波斯尼亞整體實力唔及意大利，但都應該有能力破蛋，入球大值博。