挪威奧地利半和好路

另一場B1賽事，由挪威主場鬥奧地利，挪威新星艾寧夏蘭特及馬田奧迪加特上季喺球會表現出色，予人無限憧憬；不過由德甲主力孭飛嘅奧地利喺多名經驗老將帶領下，近年表現亦突飛猛進，加上佢哋最擅長穩守突擊，等閒球隊唔易喺比賽初段搵到着數，敲半場和最穩陣。

（周六凌晨2時45分開賽）

自從2000年歐國盃後，挪威已有20年未曾入過大賽決賽周，咁啱同年出世、今年只有20歲嘅艾寧夏蘭特被視挪威近年新希望，加上21歲嘅「神童」馬田奧迪加特上季外借皇家蘇斯達亦表現出眾，令外界對挪威未來有一定期望，不過考慮到現時其他挪威成員質素普通，相信要累積一定經驗，隊波先可以發揮最佳水準，何況挪威上屆歐國聯喺C3取得小組首名，得以出戰延至明年嘅附加賽，爭奪明年歐國盃決賽周入券先係眼前最大目標，今屆歐國聯隨時作為練兵或試陣之用。

奧地利擅守半場多開0比0
連同延至明年夏天舉行嘅決賽周，奧地利近4屆歐國盃有3次入圍，實力早被認同，雖然效力拜仁慕尼黑嘅阿拉巴冇入選，ＲＢ萊比錫前鋒沙比薩、利華古遜孖寶德高域及巴姆加特寧加都係質素、經驗兼備嘅一等一好手。奧地利喺上屆歐國聯4戰2勝1和1負，表現唔曳，其中4場上半場都同對手踢成0比0，踢法穩健唔易多失，再追半場和好路。