葡萄牙守細波抗克軍

今晚歐國聯A3大戰，衞冕嘅葡萄牙主場遇上克羅地亞。雙方都有球星避戰，葡軍主將基斯坦奴朗拿度腳部受感染缺陣；「格仔兵團」兩大領袖莫迪歷及拿傑迪錫亦倦勤，相信會踢得保守，加上近4次交手全部總入球唔多過2球，捧2.5球入球細啱數。

（國際財經台76、有線662、602及603台周日凌晨2時45分直播）

雖然葡萄牙新一代球星如波基斯費南迪斯及貝拿度施華都有入波能力，但冇咗C朗呢位精神領袖，進攻點都差啲，不過佢哋防線向來穩健，對手想入波都唔係易。克羅地亞兩大中場莫迪歷同拿傑迪錫今次未獲徵召，預料國米中場波索域同車路士嘅高華錫會擔演掃蕩角色，前面留畀列比錫及柏高域衝鋒陷陣。既然以往4次交手都開細，今場再追無妨。

法國試陣半和鍊瑞典
同組另一場瑞典主場鬥法國；法國近7次對瑞典只得3勝2和2負，未見優勢，而且佢哋上屆2場分組賽作客都交白卷，表現亦唔太上心，今晚保羅普巴等球星缺陣下試陣味濃，對住硬淨嘅瑞典唔易入波。睇番上述7次交鋒全開半場和，咁好路梗係要追。

（有線661及601周日凌晨2時45分直播）