比利時搶Ｗ麥失良機

強陣遠征爭響頭炮
今晚深夜歐國聯A2賽事，「新升班」嘅丹麥主場火併比利時。兩隊今次國際賽均挑選最強陣容應戰，雖然丹麥整體實力唔曳，不過面對球星如雲、近10場全勝嘅「歐洲紅魔」比利時，級數始終仲係差一截，比利時遠征爭響頭炮，客勝可以放心捧場。

（有線664及604台周日凌晨2時45分直播）

丹麥主將狀態麻麻
丹麥上屆歐國聯B4錄得2勝2和，獲得升班A組資格，喺歐國盃外圍賽亦取得4勝4和不敗成績，以小組次名躋身決賽周，表現實而不華。不過佢哋過往對手大部分都只係二線球隊，今次歐國聯升上A級，將要面對頂尖勁旅，何況一眾主力如基斯甸艾歷臣及卡斯柏舒米高等人，季尾表現同狀態都麻麻。

比利時上屆無緣4強，今屆捲土重來，喺意甲翻身嘅盧卡古負責攻堅，皇馬中場夏薩特後上支援，佢哋對上10場國際賽錄得全勝，每場贏至少2球，實力超晒班，今場捧客勝冇走雞。