威爾斯殘陣打「保」捱細界

歐國聯B4今晚上演2場賽事，馬會暫時仲未提供有關賽事編號，大家投注前請留意公布。頭場威爾斯主場鬥保加利亞，威爾斯上場作客險勝芬蘭打響頭炮，領隊傑斯半場換走加里夫巴利明顯留力；保加利亞守優於攻，作客大踢穩陣波，預計入波唔會多。（周日晚9時開賽）

威爾斯上仗賽前有艾朗藍斯及艾殊利威廉斯等主力因傷退隊，另一主力加里夫巴利踢咗半場被換走，不過最終仍靠前鋒基化摩亞尾段一箭定江山，作客險勝芬蘭1比0，足證傑斯領軍下唔再係一人球隊；保加利亞上場對愛爾蘭補時階段失守被逼和1比1，佢哋大部分主力喺國內搵食，星味欠奉，作客冇本錢同對手鬥攻。雖然威爾斯近6場國際賽4勝2和未輸過，不過當中4場冇失波，總入球全開2球或以下，今場唔會例外。

愛爾蘭靠主場得「芬」
同組另一場愛爾蘭主場迎戰芬蘭，愛爾蘭一向靠主場搵食，芬蘭上屆歐國聯3場作客分組賽只贏過弱旅愛沙尼亞，愛爾蘭有力全取3分。

（周一凌晨零時開賽）