葡萄牙新世代擔大旗

歐國聯A3次輪大戰，瑞典主場硬撼上屆冠軍葡萄牙。葡萄牙雖有王牌C朗上陣成疑，但以曼聯中場波基斯費南迪斯為首嘅新一代已能擔大旗，尤其客場打法比以往更加進取，瑞典主場亦不保守，中位數2.5球嘅入球大好路。

（有線664、604台周三凌晨2時45分直播）

葡萄牙向來靠C朗單天保至尊，不過佢已經35歲，近年傷患漸多，包括今次腳趾受傷未必披甲，主帥費蘭度山度士開始為後C朗時代鋪路。喺英超表現突出嘅曼市孖寶波基斯費南迪斯同貝拿度施華，喺上場歐國聯都交出助攻，幫隊波大勝克羅地亞4比1，有「新C朗」之稱嘅馬體會前鋒祖奧菲歷斯，以及喺德甲回勇嘅安達施華均建功，呢班新一代已挑起大樑，令葡萄牙有本錢踢得更主動。

瑞典主場出擊唔保守
不過針冇兩頭利，同中前場相比，葡萄牙防線人才凋零，現時仍要倚重老人家比比同荷西方迪，正所謂歲月催人老，呢對4年前歐國盃冠軍功臣狀態明顯走下坡，令防線穩健度大減。

瑞典早前有左閘馬田奧臣因傷退隊，補選前鋒約翰古達迪，似乎想增強鋒線板櫈深度，其中上季喺皇蘇冒起嘅前鋒阿歷山大伊沙克，以及德甲搵食嘅古艾臣表現亦愈嚟愈好。睇番瑞典主場出擊並唔保守，近9場主場8仗有士哥，隨時藉地利同對手鬥攻，加上葡萄牙近7場作客賽事入18球，當中5次開3球或以上，今場中位數2.5球入球大值捧。