比利時破冰贏到盡

迪布尼弄瓦醒神
今晚歐國聯A2次輪賽事，比利時主場硬撼冰島。「歐洲紅魔」實力超晒班，箭頭盧卡古及梅頓斯又腳風堅順，中場奇雲迪布尼睇完BB出世後火速歸隊，所謂人逢喜事精神爽，撞正當黑嘅冰島，直取讓球主勝。

（有線665及605台周三凌晨2時45分直播）

原本奇雲迪布尼踢完上輪就因「家有喜事」告假，飛返英國陪老婆待產，喺前日奇雲迪布尼嘅「三小姐」終於出世，而迪布尼見完囡囡Suri後隨即歸隊，估計今仗可以上陣。

其實即使冇咗迪布尼，比利時依家嘅陣容都勁到冇朋友，其中箭頭盧卡古弗到漏油，唔單只喺國際米蘭大翻身，近12次為「歐洲紅魔」披甲，一共轟入12粒，信心爆晒棚，上場歐國聯輕取丹麥2比0，佢拍檔梅頓斯又入波兼助攻，隊長夏薩特終於擺脫傷患困擾，上場刻意避戰，唔排除今仗復出領軍，配合主帥馬天尼斯崇尚進攻嘅戰術，勢必火力全開。值得留意嘅，係馬天尼斯今次棄用巴舒亞伊、奧歷治及賓迪基等常規後備，反而召入安德列治新人謝利美杜古、迪馬達及禾沙治亞倫，增強新鮮感之餘，預計佢哋就算後備上陣，都會搶韁過巴舒亞伊之流。

冰島中堅恩加臣坐波監
另邊廂，冰島接連殺入2016年歐國盃及2018年世盃決賽周後，開始走下坡，而且喺英超搵食嘅基菲爾施古臣、貝治古蒙臣，以及防中艾朗根拿臣悉數落選，上場歐國聯唔單止畀英格蘭絕殺，臨尾仲有比卡比查拿臣操刀12碼宴客，黑仔到暈，主力中堅恩加臣更被逐要坐波監，實力進一步受削。何況比利時狀態大勇，近9場贏晒之餘，有7次贏3球或以上，加上近年交手食住冰島，今仗大炒冇難度，讓球主勝值得捧場。