法國質高打羅添食

2018世盃決賽翻版戰！
今晚歐國聯A3第2輪分組賽，上演2018世盃決賽翻版戰，法國主場迎戰克羅地亞。法國贏得世盃後持續強勢，相反克羅地亞高峰已過，今次缺少兩大中場主力莫迪歷及拿傑迪錫更加信唔過，法國有力繼世盃決賽後再贏一場，主勝放心捧場。

（國際財經台76、有線662、602及603台周三凌晨2時45分直播）

法國首戰作客以1比0擊敗瑞典，上場正選陣容當中，只有6名2年前世盃決賽嘅功臣喺度，領隊迪甘斯亦由4人防線轉踢3後衞，不過整體發揮冇太大走樣，其中初擔大旗嘅右翼衞里奧杜布斯、守將烏柏美卡奴，以及獲重召嘅拉比奧特都表現唔錯，前鋒基利安麥巴比上場傷出，今戰上陣成疑，但仲有曼聯前鋒安東尼馬迪爾同里爾射手伊干尼等，足證法國人才濟濟，迪甘斯亦有足夠本錢同空間進行輪換。

克羅地亞雙核冇入選
克羅地亞過去2年仍倚靠世盃亞軍功臣打江山，不過隨住部分主力年紀漸長，場上效率已大不如前，一對中堅洛夫雲及杜馬高維達已年過30，中場兩大核心莫迪歷及拿傑迪錫今次亦未有入選，攻守實力都大打折扣，結果上場作客葡萄牙慘敗1比4，而且主帥達歷上場亦未有派遣波索域、比列錫等打正選，有試陣味道，接連作客亦不宜過分高估。連同上次世盃決賽之役，法國近6次對克羅地亞取得4勝2和，有格食格味道，今次主場出擊可添食。