柏雷素爾大起飛腳

開啟進攻Mode
日職今日爆發「大」戰，柏雷素爾主場迎戰大阪飛腳。兩軍近期攻力大爆發，柏雷素爾一向攻力強，近期開啟進攻模式入波不斷，大阪飛腳剛於上仗大炒仙台維加泰，鋒力強勁殺得性起，今場2.5球嘅入球大值得留意。

（有線661及601台周三晚6時直播）

柏雷素爾憑住主攻踢法，目前排聯賽榜第5，不過該隊似乎攻守失衡，在前5位球隊當中，柏雷素爾鋒力僅次川崎前鋒，14仗攻入28球，但失球數字同樣高企，共失22球，能夠進佔聯賽前5已算相當難得。

奧隆加叉足電數胡
柏雷素爾嘅肯亞前鋒奧隆加開季至今攻入14球，位居日職射手榜榜首，拋離浦和紅鑽李安納度拿斯文圖同橫濱水手馬高斯祖利亞5球，球隊上輪仲特別畀奧隆加休息，等佢抖足精神今仗復出爭取士哥。除咗奧隆加，土炮吳屋大翔、江阪任同仲間隼斗都有數胡能力，令對手難於防範，攻力強橫，亦造就柏雷素爾今季7場聯賽主場6次開4球或以上，今仗再開入球大唔奇。

大阪飛腳季初踢法較平穩，不過近期開始大起大跌，經歷聯賽3仗不勝後，上仗作客大炒仙台維加泰4比1，觀乎該隊近期表現，近4場聯賽有3場開4球或以上，踢法變得進取，今仗與柏雷素爾兩雄相遇勝負難料，但相信會是一場入球盛宴。