鯨魚水手翻身大戰

今晚日職快車，名古屋鯨魚主場硬撼橫濱水手。鯨魚已經兩連敗，水手5場不敗走勢啱啱畀川崎前鋒終止，兩支新敗之師急欲求反彈，勢必搶攻，3.5球嘅入球大有買趁早。

（有線662及602台周三晚6時30分直播）

水手近仗多演入球騷
鯨魚聯賽重開後表現唔錯，依家以24分排第4，但比28分排第3嘅ＦＣ東京踢少2場，有機會進佔三甲，不過鯨魚近況開始回落，先喺日聯盃8強作客ＦＣ東京慘敗0比3出局，上仗主場迎戰鹿島鹿角，開賽先失2球劣勢下，最終輸1比3，佢哋最大問題係防守差勁，近2仗失咗6球，信心盡失。

水手本來狀態不俗，之前錄得5仗不敗走勢，包括日聯盃8強淘汰北海道札幌岡薩多打入4強，上仗對川崎前鋒亦憑馬高斯祖利亞先開紀錄，不過對手實在太強，最終反輸1比3，實屬非戰之罪。水手上季聯賽2鬥鯨魚錄得1勝1和，作客曾大炒鯨魚5比1，今仗舊地重遊，水手隨時反客為主，可惜佢哋防線同樣曳爆，近5場聯賽失咗11粒，全開4球或以上，大家鬥攻博反彈，3.5球嘅入球大更值得捧場。