PSG慢熱半場少交收

7將隔離老鼠拉龜
周五凌晨有場法甲補賽，上季3冠王巴黎聖日耳門（PSG）作客朗斯展開聯賽衞冕第一擊；PSG賽前爆出有7名主力確診新冠肺炎，今仗只能殘陣出擊，而且佢哋自復賽後表現慢熱，近5場正式比賽有4次半場開1球或以下，今場半場睇怕都冇乜交收。（周五凌晨3時開賽）

由於ＰＳＧ早前打入歐聯決賽，開季頭2輪法甲因此延期舉行，今場係佢哋新球季首場聯賽，不過完成歐聯決賽後，多名主力度假時不幸感染新冠肺炎，包括巴西孖寶尼馬及馬昆奴斯哥利亞、3名阿根廷球員莫路伊卡迪、里安度柏利迪斯及迪馬利亞、同哥斯達黎加門神基羅拿華斯等等，加上基利安麥巴比代表法國出戰歐國聯時亦確診，以上球員因要接受隔離，今場不能披甲，新簽嘅前西維爾門將沙治奧列高又趕唔切註冊，主帥杜曹只好大幅度換人，由謝斯洛迪古斯、卡利穆恩度呢類邊緣人擔大旗，整體戰鬥力必大打折扣。

朗斯主場頂得兩嘴
就算冇受新冠肺炎影響，ＰＳＧ復賽後表現亦較為慢熱，總計法足盃決賽、法聯盃決賽及歐聯3場淘汰賽，ＰＳＧ近5場正式比賽只曾試過2次半場領先，5場上半場只攻入3球，4次半場開1球或以下，欠缺以往場上統治力；新升班嘅朗斯首戰1比2不敵尼斯，自知技不如人必加強防守，佢哋係上季法乙腰斬前主場聯賽成績最好球隊，14戰取得9勝3和2負，今場又有5000球迷獲准入場助威，半場隨時頂得兩嘴。