里昂強鋒大鬧波爾多

周六凌晨法甲獨腳戲，波爾多主場鬥里昂；波爾多今季由加錫接手後戰績冒升，不過里昂自打入歐聯4強後信心爆棚，國際賽前首場聯賽以4比1反勝迪安，盡顯強大鋒力，今場捧2.5球入球大最穩陣。（myTV Gold 302、Now 639、714、有線655及615台周六凌晨3時直播）

波爾多上季法甲腰斬前排第12位，28場聯賽只得9勝，勝出率僅逾3成，表現令人失望，佢哋開季前辭退葡萄牙籍教頭保羅蘇沙，改由前球隊助教加錫領軍，結果開季頭2場聯賽保持不敗兼冇失波，攻守表現及士氣有明顯改善。波爾多近8次聯賽主場對里昂獲2勝1和5負，往績雖然較輸蝕，但當中只有2次食白果，7次總入球開3球或以上，並非完全捱打，承接住今季開季勢頭唔錯，主場出擊肯定踢得更進取。

荷蘭國腳迪比弗爆
里昂由於要應付法聯盃決賽及歐聯淘汰賽，比其他法甲球隊更早復操，佢哋喺歐聯先後淘汰祖雲達斯及曼城殺入4強，信心、狀態皆有保證，返番本土戰線首場聯賽對迪安雖然先失波，但憑荷蘭王牌迪比連中三元兼令對方球員擺烏龍，主場反勝4比1全取3分。里昂今季緣盡歐洲賽，可以專心應付本土賽，而且為咗重奪歐戰資格，爭入前列決心更大，捧中位數2.5球入球大夠晒穩陣。