修咸頓破宮有心得

另一倫敦球隊水晶宮，開咧戰主場鬥修咸頓。水晶宮本身大堆「十字兵」，雖然尋日官方宣布從車路士借得比利時箭頭巴舒亞伊，但就算匆匆落場默契亦成疑，點排陣考起老帥鶴臣；修咸頓近3次作客水晶宮贏晒，作客讓波見信心，讓平半上盤要跟。（Now 621周六晚10時直播）

水晶宮傷兵多
水晶宮今夏主要新兵，由昆士柏流浪簽入伊比爾伊斯，不過呢位尼日利亞中場友賽時受傷，今晚未必趕及上陣，尋日佢哋官宣借得巴舒亞伊，惟就算落場默契都會不足。佢哋最麻煩係傷兵眾多，賓迪基、加利卡希爾及湯堅斯等多位主力缺陣，季初階段捱打居多。

修咸頓從熱刺買斷右後衞獲加彼德斯，及收購華拉度列中堅穆罕默德沙利素，明顯加強後防力量。「聖人」上季復賽後表現唔曳，成績僅次曼聯同曼城，相當勇銳，去季英超神射手2哥丹尼艾格斯又留隊，保持破關能力，加上近3次作客水晶宮全勝，小讓平半放心捧場。