全北蔚山再追半和

高手過招穩陣行先
今晚韓職爆發榜首大戰，2哥全北汽車主場硬撼1哥蔚山現代。衞冕嘅全北連番甩轆，若再有閃失，隨時令爭冠機會大減，但佢哋唔擅長強攻，蔚山亦唔會同你急，預計呢場爭標關鍵戰會處於膠着，況且兩隊近年碰頭旺半場和，不妨追多鋪。

（周二晚6時開賽）

貴為韓職3連霸，全北今季表現明顯跌Watt，尤其係「獅子王」老將李東國受傷後，鋒線群龍無首，除咗古斯達禾軒歷基仍有貨交外，其餘的趙圭成、巴羅均令人失望，單靠韓教元、金甫炅、李承琪等中場後上入球，只係權宜之策。難怪全北今季經常出現老鼠拉龜冇碇埋手嘅情況，之前接連輸畀FC江原及FC城南，上仗又畀FC光州逼和3比3，依家落後榜首蔚山5分，今場「6分波」再有差池，4連霸機會將大打折扣，全北今季9場聯賽主場有7次開半場和，初段明顯欠缺強攻本錢。

半場波膽0比0最旺
蔚山聯賽作客7連勝，而且火力冠絕韓職，箭頭祖利亞尼加奧今季20場聯賽轟22粒，腳風超順，不過佢哋依家優勢明顯，今場毋須急於搶攻爭Ｗ，只要唔輸都有利爭冠，必定穩陣行先。睇番兩軍近5次聯賽交手，有4次開半場和，其中3次半場波膽為0比0，可見高手過招，初段都小心翼翼守住先，等易邊後先發力，相信今仗都係如此格局，半場和值得再追。